Ish-ministri Arben Malaj, i cili në vitin 2011 ishte i pari që publikoi një platformë për demokratizimin e Partisë Socialiste, ka komentuar nismën e deputetes socialiste Elisa Spiropali. Kjo e fundit bëri publik dokumentin e saj të titulluar “Marrëveshja e Re për Shqipërinë”, të cilin e depozitoi në Asamblenë Kombëtare të Partisë Socialiste si një kontribut për debatin e brendshëm mbi të ardhmen e partisë dhe zhvillimet politike në vend.
Në një lidhje të drejtpërdrejtë për Euronews Albania, Malaj u shpreh se lëvizjet dhe debatet brenda një partie i shërbejnë demokratizimit të vendit.
Po ashtu, ish-ministri pati edhe disa kritika për dokumentin e Spiropalit, duke thënë se ai ka nevojë për disa plotësime dhe ndryshime.
Malaj: Ka qenë një platformë që është debatuar me Ramën. Unë isha për modernizimin e Partisë Socialiste, duke kufizuar pushtetet në një dorë të vetme dhe me një sërë elementësh të tjerë. Rama ishte për ardhjen në pushtet dhe më pas për modernizimin e partisë. Më pas e pamë se çfarë ndodhi.
Unë e kam lexuar me kujdes dokumentin. Jam kundër atyre që thonë se, nëse ngrihesh brenda partisë, nuk i shërben vendit. Përkundrazi, të ngresh problemet e vendit brenda partisë tënde është një shërbim për vetë vendin.
Se cili është përfitimi, nëse merr një karrige apo fiton integritet në shërbim të vendit, kjo varet nga këndvështrimi.
Elisa Spiropali e bëri të qartë që në fillim se donte të sillte diçka të re në politikën shqiptare, duke u bërë një zë i fortë brenda PS-së. Më pas bëri një hap pas, së bashku me Braçen, duke thënë se do të luftojnë brenda partisë së tyre. Është zgjedhja e tyre, por kanë guximin të thonë gjëra që të tjerët nuk i thonë.
Dokumentin e saj doja ta shihja me dashamirësi, por po të isha në vendin e saj do të kisha shtuar edhe disa elementë. Së pari, duhet të pranonte se demokracia jonë është hibride dhe ky është shqetësimi më i madh. Së dyti, ajo mbron në dy ose tre pika marrëveshjen e vitit 2008, ndërkohë që edhe vetë autorët e saj sot thonë se ajo ishte pika e kthesës për demokracinë e partive. Së treti, nuk ka asnjë qëndrim për pushtetet absolute. Së katërti, mungon mbështetja për sindikatat dhe përfaqësimin e tyre.