Edhe pse kanë kaluar disa ditë nga pezullimi i qarkullimit të Trafikut Urban në Prishtinë, situata mbetet e pandryshuar dhe pa një zgjidhje konkrete. Dhjetëra punëtorë të ndërmarrjes publike vazhdojnë të jenë pa paga, ndërsa shërbimi i transportit urban prej ditësh është jashtë funksionit.
Komuna e Prishtinës ka bërë hapin e saj institucional duke votuar alokimin e mjeteve vetanake për të mbuluar pagesat e punëtorëve dhe shpenzimet emergjente të ndërmarrjes. Megjithatë, pavarësisht vendimit të Kuvendit Komunal, fondet nuk janë transferuar ende nga Ministria e Financave, çka ka bllokuar procesin dhe ka shtyrë në kohë zgjidhjen e problemit.
Pezullimi i pagesave ka shkaktuar pakënaqësi në rritje mes punëtorëve, të cilët prej ditësh paralajmërojnë se situata është e paqëndrueshme dhe se familjet e tyre po përballen me vështirësi të mëdha financiare.
Zyrtarët komunalë kanë theksuar se kanë kryer të gjitha procedurat e nevojshme dhe se janë në pritje të Ministrisë për ekzekutimin e buxhetit, ndërsa Ministria e Financave nuk ka dhënë ende një afat se kur do të lëshohen fondet.
Mbetet të shihet në ditët e ardhshme nëse punëtorët e Trafikut Urban do të marrin më në fund pagat e tyre dhe nëse shërbimi i transportit publik në kryeqytet do të rikthehet në normalitet.