Tensionet politike në kryeqytet janë rritur ndjeshëm, teksa mijëra mbështetës të opozitës dolën në protestë duke kërkuar largimin e kryeministrit Edi Rama.
Gjatë marshimit në Tiranë nuk munguan incidentet. Një pjesë e protestuesve hodhën molotovë dhe dogjën kazanë mbeturinash, duke shkaktuar përplasje dhe tension në disa zona të qytetit.
Në kulmin e zhvillimeve, Edi Rama reagoi përmes një postimi në rrjetet sociale. Kryeministri publikoi pamje nga situata në Iran, duke e vendosur në kontrast me atë që po ndodhte në Tiranë.
Me një mesazh ironik, Rama shkroi:
“Shqipëria me botën e lirë kundër mullahëve të Teheranit, opozita shqiptare me plehrat kundër qytetarëve të Tiranës.”
Reagimi i tij erdhi në një moment kur protesta, e nisur para Kryeministrisë, ishte shoqëruar me tensione dhe ndërhyrje të forcave të rendit.
Situata mbetet e tensionuar, ndërsa përplasja politike mes mazhorancës dhe opozitës po zhvendoset nga sheshi edhe në rrjetet sociale, me deklarata të forta nga të dyja palët.