Një aksident tejet i rëndë ka ndodhur në autostradën A8 pranë Saarbrücken, ku një baba 47-vjeçar dhe vajza e tij 13-vjeçare kanë humbur jetën tragjikisht. Ngjarja u regjistrua të dielën në mbrëmje dhe ka shkaktuar tronditje të madhe në opinion.
Sipas të dhënave nga autoritetet gjermane, familja po udhëtonte me një automjet drejt Këlnit, kur për shkaqe ende të pacaktuara, drejtuesi humbi kontrollin. Mjeti doli nga rruga dhe u përplas fillimisht me një shtyllë, e më pas goditi barrierën metalike të autostradës, duke pësuar dëmtime të mëdha.
Në automjet ndodhej edhe djali 16-vjeçar i familjes, i cili ka mbijetuar aksidentin, por ka pësuar lëndime të rënda. Ai u dërgua menjëherë në spital dhe, sipas raportimeve, ndodhet jashtë rrezikut për jetën, megjithëse është në gjendje të rënduar.
Policia gjermane ka nisur një hetim të detajuar për të zbuluar shkaqet e saktë të aksidentit. Dyshimet paraprake lidhen me rrugën e lagur pas reshjeve, por nuk përjashtohet as ndonjë problem teknik në automjet. Në vendngjarje u thirrën ekspertë të aksidenteve për të analizuar skenën.
Aksidenti ka shkaktuar vëmendje dhe reagime të shumta në media dhe rrjete sociale, ndërsa autoritetet u kanë shprehur ngushëllimet më të thella familjarëve. Shpresohet gjithashtu që djali i lënduar të marrë trajtimin e nevojshëm dhe të rikuperohet plotësisht.