Një ngjarje e rëndë është shënuar këtë të premte në Berat, ku një 30-vjeçar është gjetur i pajetë në ujërat e lumit Osum, vetëm pak minuta pasi ishte raportuar zhdukja e tij. Viktima është identifikuar si David Shehaj, banues në qytetin e Beratit.
Sipas informacioneve paraprake, trupi i pajetë i të riut u konstatuan nga banorë të zonës, të cilët njoftuan menjëherë policinë dhe shërbimet e emergjencës. Në vendngjarje mbërritën efektivët e policisë dhe grupi hetimor, të cilët nisën menjëherë veprimet për zbardhjen e plotë të rrethanave të ngjarjes.
Burime pranë hetimit bëjnë me dije se deri në këto momente po verifikohen dy pista kryesore: ajo e një ngjarjeje aksidentale dhe mundësia e vetëflijimit. Sipas të njëjtave burime, dyshimet për këtë të fundit janë shtuar edhe nga fakti se 30-vjeçari njihej nga autoritetet si përdorues i lëndëve narkotike.
Ndërkohë, policia po punon për të dokumentuar minutat e fundit të lëvizjeve të viktimës, si edhe për të marrë dëshmi nga familjarë dhe persona që mund ta kenë parë para ngjarjes.
Trupi i pajetë është transportuar drejt morgut për ekspertizën mjeko-ligjore, e cila pritet të hedhë më shumë dritë mbi shkakun e vdekjes.
