Kryeministri Edi Rama ka vendosur ndryshime në drejtimin politik të qarqeve, duke i besuar Tiranën një prej figurave më të vjetra të Partisë Socialiste, Taulant Ballës. Vendimi është marrë në mbledhjen me dyer të mbyllura të Asamblesë Kombëtare të PS, që po zhvillohet në Gjirin e Lalëzit.
Ndryshimet prekin disa qarqe, ndërsa në disa të tjera drejtuesit politikë mbeten të njëjtë për shkak të rezultateve pozitive elektorale në zgjedhjet e fundit.
Taulant Balla drejtues politik i Qarkut Tiranë
Vendimi më i rëndësishëm i mbledhjes së Asamblesë Kombëtare të PS është emërimi i Taulant Ballës si drejtues politik i Qarkut Tiranë. Kryeqyteti konsiderohet qarku më i rëndësishëm elektoral dhe Partia Socialiste ka vendosur t’ia besojë një prej figurave kryesore të saj.
Mësohet se Tirana është ndarë në 32 zona elektorale dhe për çdo njësi do të ketë 2 deri në 3 deputetë të deleguar për organizimin e strukturave dhe fushatës elektorale.
Emrat e drejtuesve politikë të PS në qarqe
Në mbledhjen e Asamblesë Kombëtare janë vendosur edhe drejtuesit politikë të qarqeve të tjera. Disa prej tyre janë ndryshuar, ndërsa të tjerë mbeten të njëjtë për shkak të rezultateve të mira në zgjedhjet e fundit.
Drejtuesit politikë të PS në qarqe janë:
- Qarku Tiranë – Taulant Balla
- Qarku Durrës – Blendi Klosi
- Qarku Lezhë – Ermal Nufi
- Qarku Shkodër – Enea Karakaçi
- Qarku Dibër – Ulsi Manja
- Qarku Kukës – Erjon Malaj
- Qarku Elbasan – Arbjan Mazniku
- Qarku Berat – Ervin Demo
- Qarku Vlorë – Bledi Çuçi
- Qarku Fier – Belinda Balluku
- Qarku Gjirokastër – Mirela Kumbaro
- Qarku Korçë – Niko Peleshi
Rama dërgon ministrat e rinj në veri
Dy ministrat e rinj të kabinetit qeveritar, Ermal Nufi dhe Enea Karakaçi, janë angazhuar menjëherë nga kryeministri Edi Rama si drejtues politikë të Partisë Socialiste në qarqet e veriut. Ata pritet të dalin në terren për organizimin e strukturave dhe përgatitjen e fushatës elektorale.
Ndërkohë, në qarkun e Dibrës është zhvendosur Ulsi Manja, pasi Partia Socialiste ka pasur vështirësi për të fituar përballë Partisë Demokratike në disa beteja elektorale në këtë qark.
Qarqet ku nuk ka ndryshime
Në disa qarqe nuk ka pasur ndryshime në drejtimin politik, pasi drejtuesit aktualë kanë arritur rezultate pozitive në zgjedhjet e fundit dhe Partia Socialiste synon të ruajë të njëjtin trend elektoral.
Qarqet ku nuk ka ndryshime janë:
Elbasan, Korçë, Berat, Fier, Vlorë dhe Gjirokastër.
Këto qarqe konsiderohen zona ku Partia Socialiste ka një bazë elektorale të konsoliduar dhe nuk është parë e nevojshme të bëhen lëvizje në drejtimin politik.