Nora dhe Roberti rikthehen në qendër të vëmendjes: Postimi i Besnik Tahirit ndez sërish diskutimet për marrëdhënien e tyre. Ndarja e këngëtares Nora Istrefi dhe Robert Berishës ka qenë një nga temat më të komentuara në showbiz për vite me radhë.
Megjithëse të dy kanë vijuar jetën e tyre pas divorcit, publiku ka mbetur gjithmonë i interesuar për raportin që ata ruajnë mes tyre.
Së fundmi, dyshja është shfaqur së bashku në një intervistë, duke e bërë sërish temë diskutimi marrëdhënien e tyre. Prezenca e përbashkët dhe komunikimi miqësor mes tyre ngjalli reagime në rrjete sociale, duke i rikthyer në qendër të vëmendjes.
Ndër reagimet më të komentuara ishte ai i Besnik Tahirit, i cili në një postim të çiftit të dikurshëm shkroi shkurtimisht: “Kojshitë më të mirë.”
Me këtë frazë, Tahiri la të kuptohej se Nora dhe Roberti janë fqinjë dhe, sipas interpretimit të fansave, madje mund të bashkëjetojnë në të njëjtën shtëpi apo kompleks banimi — pretendim që ngriti menjëherë pluhur në mediat rozë.
Sipas Kosovarja, insinuata e Tahirit ka mjaftuar për të ndezur komentet dhe për të shtuar kuriozitetin e publikut mbi natyrën aktuale të raportit mes Norës dhe Robertit.
Megjithatë, deri tani nuk ka asnjë konfirmim zyrtar nga artistët, të cilët vazhdojnë të shfaqen korrektë dhe respektues ndaj njëri-tjetrit, por pa dhënë shumë detaje nga jeta e tyre private.
Historia e tyre vazhdon të mbetet ndër më të ndjekurat, dhe çdo detaj i ri rikthen menjëherë vëmendjen e publikut.
