Ramir Haderi, drejtori i Autoritetit Kombëtar të Ushqimit në Shkodër, është dhunuar barbarisht mbrëmjen e sotme nga një person ende i paidentifikuar. Burime nga kryeqendra e veriut bëjnë me dije se autori e ka qëlluar edhe me qytë pistolete.
Policia e Shkodrës njoftoi se kreu i AKU-së është paraqitur rreth orës 21:30 në Spitalin Rajonal Shkodër për ndihmë mjekësore dhe ka deklaruar se është goditur me sende të forta nga një shtetas ende i paidentifikuar.
Ngjarja ka ndodhur në lagjen “Rus” të Shkodrës dhe Ramir Haderi, siç raportohet, ndodhet në spitalin rajonal dhe ka plagë të rënda në kokë dhe në trup, përcjell newsbomb.al.
Grupi hetimor nën drejtimin e Prokurorisë po punon për sqarimin e rrethanave të rastit, identifikimin dhe kapjen e autorit, i cili e ka dhunuar Ramir Haderin teksa ky i fundit ka qenë duke ecur me gruan në trotuar.
Dyshimet janë se dhunimi barbar i Ramir Haderit lidhet me punën e tij në kryeqendrën e veriut, sepse institucioni ka ndërmarrë kontrolle dhe verifikime të shumta në biznese e subjekte të tjera për zbatimin e kushteve higjeno-sanitare të tregtimit.