Viti 2026 sjell ndryshime të rëndësishme në skemën e pensioneve në Shqipëri, duke prekur drejtpërdrejt moshën e daljes në pension, vitet e punës së kërkuara dhe përfitimet mujore për mijëra qytetarë.
Reforma e nisur në vitin 2015 hyn në një fazë të re, ndërsa paralelisht ka nisur edhe aplikimi i skemës së bonuseve mujore, që synon lehtësimin e kostove të jetesës për pensionistët.
Kriteret e reja, kush del në pension në 2026
Ndryshimi më i ndjeshëm prek gratë, pasi për herë të parë mosha e daljes në pension arrin në 62 vjeç. Ndërkohë, për burrat mosha mbetet e pandryshuar.
Kriteret kryesore:
Mosha e pensionit për gratë: nga 61 vjeç e 10 muaj në 62 vjeç
Mosha e pensionit për burrat: 65 vjeç (pa ndryshim)
Vitet e punës për të dy gjinitë: nga 38 vite e 8 muaj në 39 vite
Ekspertët vlerësojnë se ky ndryshim paraqet sfidë, pasi një pjesë e madhe e pensioneve në vend janë të pjesshme për shkak të mungesës së viteve të sigurimit.
Bonusi mujor i janarit, sa përfitojnë pensionistët
Nga janari 2026 ka hyrë në fuqi edhe një skemë bonusësh mujore, e cila synon remindjen e ndikimit të inflacionit. Megjithatë, autoritetet sqarojnë se bonuset nuk përfshihen në bazën e pensionit dhe nuk ndikojnë në indeksimin vjetor.
Rritjet mujore sipas kategorive:
Pension urban i plotë: +1,800 lekë
Pension rural: +1,000 lekë
Urban i pjesshëm: +800 lekë
Pension familjar: +700 lekë
Pension invaliditeti: +600 lekë
Kjo do të thotë se gjatë indeksimit të ardhshëm, përqindja e rritjes do të llogaritet mbi pensionin bazë dhe jo mbi shumën e bonusit.
Objektivi deri në vitin 2030
Qeveria synon që deri në vitin 2030 pensioni minimal të arrijë në 200 euro, ndërsa pensioni mesatar të shkojë në 400 euro, përmes një rritjeje graduale të përfitimeve.
Për këtë arsye, gjatë vitit 2026 pritet të prezantohet edhe një reformë e re strukturore, e cila do të fokusohet në:
qëndrueshmërinë financiare të skemës në një popullsi që po plaket,
uljen e diferencave dhe përmirësimin e pensioneve të ulëta, veçanërisht për sektorin rural dhe personat me periudha të gjata papunësie.
Ndryshimet e reja pritet të kenë ndikim të drejtpërdrejtë në ekonominë e familjeve shqiptare, duke e bërë vitin 2026 një pikë kthese për sistemin e pensioneve në vend.